بەڕێوەبەری نوێی هاتوچۆی سلێمانی دەست بەكاربوو

هاتوچۆ|مەریوان ئیسماعیل
فۆتۆ|بەرهەم مەحمود
ئەمڕۆ بەڕێوەبەری نوێی هاتوجۆی سلێمانی دەست بەكاربوو، لەوتەیەكیشدا داوای لە ئەفسەران و كارمەندانی هاتوچۆ كرد بەردەوامبن لەخزمەتكردنی  زیاتری هاوڵاتیان و ڕابەڕاندنی كارو مامەڵەی هاوڵاتیاندا.
ئەمڕۆ  (09- 09 – 2018) عەمیدی مافناس (فەرەیدون عومەر ئەحمەد) بەئامادەبونی (د. هەفاڵ ئەبوبەكر) پارێزگاری سلێمانی و ژمارەیەك لەئەفسەران و كارمەندانی هاوتوچۆ وەك بەڕێوەبەری نوێی هاتوچۆی سلێمانی دەست بەكاربوو، بەوبۆنەیەشەوە پارێزگاری سلێمانی لەوتەیەكدا سوپاسی سەرجەم ئەفسەران و كارمەندان و فەرمانبەرانی شارستانی هاتوچۆی سلێمانی كرد كە هەمیشە لەخەمی پاراستنی سەرو ماڵی هاوڵاتیان و جێ‌ بەجێكردنی یاساكانی هاتوچۆدان، هاوكات پیرۆزبایی لە عەمیدی مافناس (فەرەیدون عومەر ئەحمەد) كرد بەبۆنەی دەست بەكاربونی وەك بەڕێوەبەری نوێی هاتوچۆی سلێمانی .
لەو میانەیەشدا عەمیدی مافناس ( فەرەیدون عومەر ئەحمەد) بەڕێوەبەری نوێی هاتوچۆی سلێمانی لەوتەیەكدا داوای لەسەرجەم ئەفەسەران و كارمەندانی هاتوچۆ كرد، كە بەگیانێكی نیشتمان پەروەرانەو جێ‌ بەجێ كاری یاساو رێنماییەكانی هاتوچۆ بن و هاوكات بەردەوام لەخزمەتكردنی زیاتری هاوڵاتیاندابن لەبواری هاتوچۆدا.