چۆنیەتی گۆڕینی لەین

گۆڕینی هێڵ یان لەین کردارێکی ڕۆژانەیە کە زۆربەی شۆفێران لە کاتی لێخوڕین ئەنجامی دەدەن، ئەگەر بە شێوەیەکی نادروست بکرێت ئەگەری هەیە ببێتە هۆی ڕوودانی پێکدادان و دروستکردنی مەترسی بۆ خۆت و بەکارهێنەرانی تری شەقام و ڕێگاکان. بەشێک لە ڕووداوەکانی هاتووچۆ بەهۆی نەبینینی نزیک بوونەوە لە ئۆتۆمبێلی دیکە، پشتگوێخستنی خاڵی کوێر یان گۆڕینی لەناکاوی هێڵ ڕوودەدەن. لەبەرئەوە پێویستە هەر شۆفێرێک پێش ئەوەی بە ئۆتۆمبێلەکەی دەست بکات بە جوڵە لەسەر شەقام و ڕێگاکان، دڵنیا ببێتەوە لە پارێزراوی دۆخەکە و پابەندی یاساکانی هاتووچۆ ببێت، وەک بەکارهێنانی گڵۆپی ئاماژەکان بۆ ڕاست و چەپ، پشکنینی ئاوێنە و پاراستنی دووری گونجاو یان ماوەی سەلامەتی لەگەڵ ئۆتۆمبێلەکانی تر، ئەمانە هەموو هەنگاوی گرنگن بۆ کەمکردنەوەی مەترسییەکان. بە (هەڵسوکەوتێکی بەرپرسیارانە) دەتوانین شەقامەکان و ڕێگاکان پارێزراوتر بکەین و ژیانی خۆمان و کەسانی تر بپارێزین.

بۆ گۆڕینی هێڵ (لەین) ئەم ڕێنماییە گرنگانە جێبەجێ بکە:

• پێش گۆڕینی هێڵ، هەمیشە گڵۆپی ئاماژە بەکاربهێنە بۆ لای ڕاست دەڕۆیت یان بۆلای چەپ. 
• ئاگاداری ئاوێنەکان و ناوچەی کوێربە و بەباشی بیپشکنە پێش بڕیاردان بۆ گۆڕینی هێڵ.
• تەنها کاتێک هێڵ بگۆڕە کە ماوەی سەلامەتی پێویست هەبێت لەنێوان ئۆتۆمبێلی خۆت و ئۆتۆمبێلەکانی دیکە لەسەر شەقام و ڕێگاکان.
• خۆت بە دوور بگرە لە گۆڕینی هێڵ بە شێوەیەکی خێرا و بەپەلە، لەبەرئەوەی ئەم کارە مەترسیدارە و ئەگەرەکانی دروستبوونی ڕووداو زیاد دەکات. 
• لە کاتی گۆڕینی هێڵ، پێویست بە شپرزە بوون و شڵەژان ناکات، خێراییەکەت بە جێگیری بهێڵەرەوە خێرایی ناپێویست مەترسییەکان زیاد دەکات.

ئامادەکردنی: هێمن سالار