لێخوڕینی ئۆتۆمبێل ڕه‌فتارێكی شارستانی و ئاكارییه‌

برای شۆفێر لێخوڕینی ئۆتۆمبێل هه‌ڵسوكه‌وتێكی شارستانی و ئاكارییه‌،واته‌ شۆفێری سه‌ره‌ڕای ئه‌وه‌ی حه‌ز و ئاره‌زوو هونه‌ر وره‌وشته‌، پێویسته‌ پابه‌ندی لێخوڕینیێكی ته‌ندروستانه‌ بكرێت به‌ له‌به‌رچاوگرتنی گونجاوترین رێگا بۆ گه‌یشتن به‌ شوێنی مه‌به‌ست به‌ سه‌لامه‌تی هه‌روه‌كو ده‌وترێت (گرنگ نییه‌ زوو بگه‌یته‌جێ به‌لكو گرنگ ئه‌وه‌یه‌ به‌ سه‌لامه‌تی بگه‌یته‌جێ)

برای شۆفێر ئه‌وه‌ بزانه‌ كه‌ ته‌نیا تۆ له‌سه‌ر شه‌قام نیت و پارێزگاریت له‌ سه‌لامه‌تی خه‌ڵكی داوایه‌كی شه‌رعییه‌، واته‌ ئه‌گه‌ر تۆ ئۆتۆمبێلیكی كۆن و هیلاكت پێبێت و كه‌موكورتییه‌كی زۆری تیادابێت ئه‌وه‌ ده‌گه‌یه‌نێت كه‌ تۆ ژیانی خۆت و خه‌ڵكی ده‌خه‌یته‌ مه‌ترسییه‌وه‌.

نه‌پشكنینی تایه‌ و به‌نزین و ئاو و ڕۆن وپشتگوێخستنی كه‌موكوڕییه‌ هونه‌رییه‌كان مانای كه‌مته‌رخه‌می شۆفێر ده‌گه‌یه‌نێت، هه‌روه‌ها شاره‌زانه‌بوون له‌ هونه‌ری لێخوڕیندا، ژیانی شۆفێر و سه‌رنشین و پیاده‌ ده‌خاته‌ مه‌ترسییه‌وه‌.

مافه‌كانی ڕێگاوبان و به‌شارستانیبوونی لێخوڕین وا ده‌خوازێت كه‌ په‌یڕه‌وی ئه‌م خاڵانه‌ بكرێت:
- ڕێزگرتنی پیاده‌ڕه‌وان
- ڕۆیشتن به‌ هێمنی و له‌سه‌رخۆیی
- ڕێزگرتن له‌ یاساكانی هاتوچۆ كه‌ به‌رژه‌وه‌ندی هه‌مووانی له‌به‌رچاوگرتووه‌
- سه‌رنجدان و ئاگاداربوون له‌ پێشی خۆت له‌به‌رئه‌وه‌ی ئاوڕدانه‌وه‌ی زۆر دوچاری كاره‌ساتت ده‌كاته‌وه‌
- هاوكاری و یارمه‌تیدانی ئه‌و كه‌سانه‌ی پێویستیان به‌ یارمه‌تییه‌
- ڕووخۆشی و توڕه‌نه‌بوون
- رێنمایكردنی مناڵان
- رێگه‌دان به‌ ئۆتۆمبیله‌كانی فریاكه‌وتن و ئه‌وانه‌ی بارودۆخێكی كتوپڕیان هه‌یه‌